Бүгін Жаңақала аудандық жастармен жұмыс жөніндегі ресурстық орталығының ұйымдастыруымен «Жастар керуені» ақпараттық-түсіндірме жұмыстарына бағытталған жобасы аясында Жаңақала колледжінің студенттерімен кездесу кешін өткізді.
Аталмыш мекеме басшысы Дәурен Мерешов сөз алып, барша қонақтарды таныстырғаннан кейін, шараның өткізу мақсатын түсіндіріп кетті. Әрі қарай, Құрманғазы атындағы саз колледжінің студенттері дайындаған концерттік бағдарлама жалғасын тапты. Көңілге қанат бітірер ән де, жан сергітер күй де, мың бұрала билеген бишілер де ортадан табылып, көрермендер таң қалысын жасырмады. Салтымыздың сыбызғы үнін сыңғырлатқан бір топ өнерпаздар сахна төрінен табылғаннан кейін, жобаның соңғы бөліміне сәйкес, актуалды сауалдарға байланысты тренингтер өткізілді. Мәселен, алғашқы көмек, қолөнер, волонтерлік және мобилографияның пайдасы және қазіргі таңдағы сұранысы жөнінде азын-аулақ ой бөлісіп, жағымды әсер сыйлады.
- Бұл жоба барысында 11-27 қараша аралығында 12 аймақта 1300-ге жуық жастармен кездесу өткіздік. Жобаның басты мақсаты – кез келген бағытта жас буынға қолдау көрсету, олардың болашаққа деген сенімділіктерін арттыру. Кездесу барысында жастардың сұрақ-ұсыныстары тыңдалып, оларға мемлекеттік бағдарламалар, ұлттық құндылықтар, кәсіпкерлік және отбасы тәрбиес, волонтерлік жұмыстар жөнінде ақпарат берілді. Сыршыл ақын Мағжан Жұмабаев жырлағандай «Қырандай күшті қанатты, мен жастарға сенемін!». Иә, жастардан күтер үміт зор. Бұл үшін мемлекет тарапынан да көп қолдау бар екені сөзсіз, - дейді БҚО Жастармен жұмыс жөніндегі ресурстық орталығының басшысының орынбасары Нұрсұлтан Чапайұлы.
Ақерке Ғилымхан,
Жаңақала ауданы
