Бәйтерек ауданы аумағындағы тағы бір көрікті қысқы демалыс орындарының бірі – «Алаш» туристік базасы. Нысанның жаңа иесі – Мұрат Қуанышқалиев. Кәсіпкер қазіргі таңда бизнес нысанының бағытын жаңғыртып, жетілдіру жолында жұмыстанып жатыр.
Мұрат Орынғалиұлы 2016 жылы Орал қаласында «Сәби» балабақшасын ашып, бүгінде 7 филиалын іске қосқан. Онда мыңдаған бүлдіршін тәрбиеленуде. Қызмет көрсету сапасы да халық көңілінен шығуда. Кәсіпкер қазіргі таңда 180 адамды тұрақты жұмыспен қамтып отыр. Биыл, кәсіби түрде жаңа әрі заманауи жобаны қолға алып, оқу процесі мен демалысты сәтті ұштастырып, ұйымдастыруда.
Суреттер "История успеха" журналынан алынды
Жобаның келесі кезеңі келушілерге арналған қос қабатты қонақүй құрылысын аяқтау жоспарланған. Кәсіпкерлік мектебінің студенттері 3 айлық оқыту курсынан өтеді.
Жас ерекшелігіне шектеу қойылмайды. Ал оқу процесі табиғат аясында жүргізілмек. Мысалы, курс барысында қатысушылар теплоходта серуендеп, кешкі уақытта оттың айналасында бас қосып, басқа да қаланың көрікті жерлеріне саяхаттап білім алу мүмкіндігіне ие болады. Жобаға тәжірибелі мамандар тартылған. Олардың қатарында психолог, профоринтолог, заңгер, бухгалтер бар. Аталған мамандар кәсіби біліктіліктерімен қатар, өмірлік тәжірибелерімен де бөліседі. Сонымен қатар, кәсіпкерлік мектебінде талантты адамдарды тегін оқыту үшін гранттар ұтып алу процесі де қарастырылған.Кәсіпкерлер мектебі түлектеріне кәсіп ашып, таза табысқа жеткенше қолдау көрсетеді. Келісім шарт бойынша олар мектепке серіктес ретінде 7 жыл көлемінде табысының 7 пайызын аударып отырады.
Жобаның толық ашылуы 1 қыркүйекке жоспарланған, ал наурыз айында техникалық ашылу өтеді. Осы уақытта жобаның 50 пайызы дайын болады. Қазіргі таңда кәсіпкер қысқы демалыс орнының қызметін жалғастыра отырып, жөндеу жұмыстарын жүргізуде. Болашақта білім ұясы ретінде де жетілдіріліп, әр адамға жаңа мүмкіндіктер сыйлайтын, кәсіпкерліктің дамуына зор үлес қосатын орын болмақ.
Гүлім Орда,
Бәйтерек ауданы
