Ақорданың баспасөз қызметінің хабарлауынша, Президент Қасым-Жомарт Тоқаев Дүниежүзілік кеден ұйымының Бас хатшысы Иэн Сондерспен кездесу өткізді.
Фото: aqorda_resmi
Кездесу барысында Мемлекет басшысы еліміздегі кеден заңнамасын жетілдіру мен әкімшілендіру тиімділігін арттырудағы ынтымақтастықтың маңызын атап өтті. Қазақстан Еуразиядағы көлік қатынасын нығайтып, жүк тасымалына қолайлы жағдай жасауға күш салып жатқанын, сондай-ақ кеден рәсімдерін оңтайландыру үшін цифрлық шешімдер мен «ақылды шекара» моделін дәйекті түрде дамытып келе жатқанын жеткізді.
Өз кезегінде Иэн Сондерс Қазақстанның кедендік әкімшілендіру ісін жетілдіруде, цифрлық шешімдерді енгізуде және институционалдық құзыретті нығайтуда елеулі табысқа жеткенін атап өтіп, өзара қарым-қатынас қарқынына жоғары баға берді. Тараптар 30 жылдан аса уақыт бойы жалғасып келе жатқан ынтымақтастықты одан әрі нығайтуға бейіл екенін растап, әлемдік саудадағы сын-қатерлер мен Орталық Азия өңірінің көлік-логистика әлеуетін арттыру мәселелерін талқылады.
