19.11.2026, 10:15
Оқылды: 6

Оралда Ұлттық ұланның «Жас бүркіт» әскери-патриоттық клубына 24 оқушы қабылданды

Орал қаласындағы №7 мектеп-гимназияның 7-сынып оқушылары «Жас бүркіт» әскери-патриоттық клубының қатарына қосылды. Іс-шара аясында ҚР ІІМ Ұлттық ұланының 5517 әскери бөлімі мен білім ордасы арасында жастардың әскери-патриоттық тәрбиесін дамытуға және оқушыларды Отанға қызмет ету дәстүрлеріне баулуға бағытталған ынтымақтастық туралы меморандумға қол қойылды.

IMG-20261119-WA0000

Клуб қатарына қабылданған өрендер еліміздің лайықты азаматы болуға, оның тарихы мен дәстүрін құрметтеуге, тәртіпті және Отанға қызмет етуге дайын болуға салтанатты түрде ант берді.

Іс-шараның негізгі бөлігінде Ұлттық ұлан Бас қолбасшысының кеңесшісі майор Әлібек Әбділов «Ерлік сабағын» өткізді.

Ол оқушыларға Ұлттық ұлан әскери қызметшілерінің ерлігі мен батылдығы, қиын сәттерде бейжай қалмай, адамдарға көмекке келіп, қайғылы жағдайлардың алдын алған оқиғалары туралы айтып берді.

Өмірде болған осындай оқиғалар оқушыларға ерліктің мәнін тереңірек түсінуге және өзгеге қол ұшын созуға дайын азаматтың бойында қандай қасиеттер болуы керектігін ой елегінен өткізуге мүмкіндік берді.

Сабақ соңында оқушылар нағыз «Жас бүркіт» қандай болуы керектігін талқылап, клуб мүшесіне тән батылдық, адалдық, тәртіптілік, жауапкершілік пен өзара көмек секілді қасиеттерді атады.

IMG-20261119-WA0001

Мәдени бағдарлама 5517 әскери бөлімінің оркестрі орындаған музыкалық шығармалармен жалғасты. Оркестрдің өнер көрсетуі салтанатты шараның мазмұнын аша түсті.

ҚР Ұлттық ұланы “Батыс” өңірлік қолбасшылығының баспасөз қызметі

Узнайте первым о важных новостях Западного Казахстана на нашей странице
в Instagram и нашем Telegram - канале