Оралда кісі өлтіруге оқталды деген күдікпен полиция қызметкері қамауға алынды, деп хабарлайды ҚазАқпарат тілшісі.
БҚО полиция департаментінің баспасөз қызметінен түскен мәліметке қарағанда, аталған азамат ҚР Қылмыстық істер жүргізу кодексі 128-бабына сәйкес уақытша оқшаулау изоляторына жатқызылды.
Оралда түнгі клубта ауыр жарақат алған 27 жастағы жігіттің ауруханаға түсіп, бұл оқиғаға полиция қызметкерінің қатысы бар-жоғы тексерілген болатын.
Алдымен бұл оқиға бойынша ҚР ҚК 107-бабы 1-бөлігіне сәйкес (денсаулыққа қасақана ауырлығы орташа зиян келтiру) қылмыстық іс қозғалған еді.
Қазіргі кезде бұл іс ҚР ҚК 24-бабы 3-бөлігі – 99-бабы 1-бөлігіне сәйкес (адам өлтіруге оқталу) қайта дәрежеленді. Осыған орай тергеу амалдары жүргізіліп, істің мән-жайы анықталу үстінде.
