2019 жыл кәсіп ашып, ісімді дөңгелентемін деген тасқалалықтар үшін ерекше жыл болды. Өйткені тек биылдың өзінде 150-ден астам адам қайтарымсыз гранттың байқауына қатысып, оның 91-і грант иегері атанды.
Олардың ішінде 15-і көп балалы аналы болса, 7-уі аз қамтылған отбасынан және 8-і мүмкіндігі шектеулі жан. Ал 3-уі жұмыссыз, қалғандары жастар санатына жататындар. Айта кету керек биыл қайтарымсыз грантқа Ұлттық қор мен республикалық, қала берді облыстық бюджеттен барлығы 45 млн.теңге көлемінде қаржы бөлінсе, жыл аяғында оның барлығы толықтай игерілді.
Тасқала ауданы орталығындағы балалардың мектептен тыс жұмыс орталығында нәтижелі жұмыспен қамту және жаппай кәсіпкерлікті дамытудың 2017-2021 жылдарға арналған "Еңбек" мемлекеттік бағдарламасы аясында жаңа бизнесті дамыту мақсатында берілген мемлекеттік грант иегерлерінің көрмесі ұйымдастырылды.
Аталмыш шараға аудан әкімінің орынбасары А.Баяндықов, «Нұр Отан» партиясы Тасқала аудандық филиалы төрағасының бірінші орынбасары Л.Жұбанышқалиева, сондай-ақ мекеме басшылары қатысты.
Көрмеге мемлекет қолдауына ие болып, аз ғана уақытта кәсібінің жемісін көріп үлгерген жеке кәсіпкерлер қатысты. Олардың қатарында Достық ауылынан Қ.Мақсотованың «Қыз жасауы», суши және ролл тамағын дайындайтын тасқалалық З.Кульшманованың «Баракат», кондитерлік өнім шығаратын Ж.Идрисованың «Жанар и Ко» мен А.Дүйсенгалиеваның «Дүйсенгалиев», сондай-ақ жарнамалық қызметпен айналысатын А.Жалбуровтың «Azamat», құс шаруашылығымен айналысатын И.Жумагалиевтің «Жумагалиев», ешкі өсіруді қолға алған Д.Мажиковтың «Даяна», Н.Атуовтың «НурКаир», тасқалалық А.Тоқмамбетованың «Аңсар», сондай-ақ қолөнер бұйымдарымен айналысатын шежіндік Ү.Танабаеваның «Ү.К.І», жылқы шаруашылығымен айналысатын А.Қадыровтың «Қайрат» және ағаш бұйымдарын жасайтын Қ.Теміровтің «Темиров», ояндық А.Акапованың сүт өнімдерін дайындайтын «Акапова» сынды жеке кәсіпкерлер бар. Олар көрмеде өнімдерін ұсынды.
Шара барысында жас кәсіпкерлер өздеріне қолдау білдірген аудан басшылығына алғыс айтты.
Назгүл Серікқызы
фотоға түсірген Ш.Қадыров
Тасқала ауданы
zhaikpress.kz
Батыс Қазақстанның маңызды жаңалықтарын біздің Instagr am-дағы парақшамыздан және Telegram арнамыздан алғашқы болып біліңіздер
