Тасқала ауданы орталығындағы «Самғау» коворкингінде аудандық мәдениет, тілдерді дамыту, денешынықтыру және спорт бөлімінің ұйымдастыруымен спортшылар арасында «Жыл қорытындысы - 2019» атты мерекелік шара өтті.
Оған аудан әкімі Алдияр Халелов арнайы қатысты.
Алдияр Сансызбайұлы аудан абыройын асқақтатып жүрген спортшыларымыздың жеткен жетістігін тілге тиек ете келіп, алдағы жылы атқарылатын жұмыстарды да айтып өтті. Жастарды спортқа тәрбиелеп, ауданда бұқаралық спорттың өркендеуіне өзіндік үлес қосып жүрген үздіктерге арнайы дайындалған марапаттарды табыстады.
Айта кету керек, шара барысында спорт ардагері Сағынғали Досщанов пен Болат Садыковқа «Дене шынықтыру мен спортты дамытуға қосқан үлесі үшін» төсбелгісі салтанатты түрде табыс етілді.
«Спорт ардагері» аталымына Роман Мукаев ие болса, «Үздік денешынықтыру пәні мұғалімі» аталымы Қазбек Кушалиевке бұйырды. Ал «Үздік жаттықтырушы» аталымымен Еркебұлан Мұсағалиев марапатталса, «Үздік жас спортшы» аталымын Алихан Карабалиев жеңіп алды. Ал «Жыл спортшысы» аталымы жақында ғана әлем чемпионы атанған Анель Нұрболатқа бұйырса, «Нәзік жанды спортшы» аталымын Гүлзира Мукашева алды.
Сондай-ақ «Үздік команда» аталымымен Шежін ауылдық округінің құрама командасы марапатталса, «Спорттық ауылдық округ» аталымын Достық ауылдық округі иеленді. Ал «Спорттық мекеме» аталымын Қ.Сәтбаев атындағы мектеп ұжымы қанағат тұтты.
Барлық аталым иелеріне алғыс хаттар мен естелік сыйлықтар табысталды.
Болат Бек
Тасқала ауданы
zhaikpress.kz
Батыс Қазақстанның маңызды жаңалықтарын біздің Instagr am-дағы парақшамыздан және Telegram арнамыздан алғашқы болып біліңіздер
