Бүгін Тасқала аудандық мәдени демалыс орталығында бүлдіршіндерге арналған «Қош келдің, Жаңа жыл» атты аудан әкімінің шыршасы өтті.
Оған көп балалы және аз қамтылған отбасы мен патронаттық тәрбиеленушілер қатарынан барлығы 50 бала қатысты.
Алдымен аудан әкімі Алдияр Сансызбайұлы бүлдіршіндерді жаңа жыл мерекесімен құттықтап, оларға бақытты балалық шақ тіледі. Содан соң балалармен бірлесе шырша шамын жақты. Содан соң жаңа жылға қатысқан әр балаға Алдияр Сансызбайұлы жылы күртелер мен тәтті толы сыйлықтарды тарту етті. Айта кету керек, әр балаға берілген сыйлық құны биыл 20 мың теңгені құрады. Олардың қатарында атаулы әлеуметтік көмек алатын 21 бала болса, 19-ы аз қамтылған, 9-ы көп балалы болса, 1-і патронаттық тәрбиедегі бала.
Жаңа жыл кешінде бүлдіршіндер Аяз ата мен Ақшақарға өз өнерлерін көрсетіп, сыйлықтарға ие болды. Бұл күні аудандық мәдениет үйінің өнерпаздары балғындардың қиялына қанат бітіретін ертегілер әлемінің қаһармандарын сомдап, түрлі ғажайыптарға толы қойылымдар көрсетті. Қуанышқа кенелген балалар салтанатты кеште ризашылықтарын танытып, өздерінің ақжарма тілектерін арнады.
Болатбек Сапаргалиев,
фотоға түсірген Ш.Қадыров
Тасқала ауданы
zhaikpress.kz
Батыс Қазақстанның маңызды жаңалықтарын біздің Instagr am-дағы парақшамыздан және Telegram арнамыздан алғашқы болып біліңіздер
1349
