Теректі ауданында өтіп жатқан «Жыр дүлділі – Марабай» атты республикалық-аймақтық жыршылар додасының екінші бөлімінде қатысушылар еркін тақырыпты жырлады.
Тінін тарқатсақ, М.Алдамжарова мен К.Түрікпен «Көроғлы», Ө.Жетесов «Нар қыз», М.Сүгірбай «Жанқожа батыр»дастандарын, Е.Олжағали мен С.Жанғазиев «Қобыланды батыр» жырларын орындап көрерменнің қошеметіне бөленді.
Қазылар алқасының шешімімен бас жүлде (300 мың теңге) қызылордалық Күнсұлу Түрікпенге бұйырды.
Өзін «театр суретшісі» деп таныстыруды сұраған Сәкен Жанғазиев қатарластарынан оқ бойы оза шауып, I орынды иеленді. Ал II орын Марат Сүгірбайдың еншісінде кетсе, III орынды Өмірхан Жетесов қанжығасына байлады. Сондай-ақ Малика Алдамжарова мен Еркебұлан Олжағалилар да жүлдегер атанды.
Әділ қазылар алқасының мүшесі Берік Жүсіпов жүлдегерлерді құттықтап, марапаттарды ашық түсіндіріп өтті. Соның ішінде оралдық С.Жанғазиевке ерекше ықылас білдірді. Оның ішкі жан-дүниесімен суретті түсінетіні секілді, жыр-дастандарды да сезініп айтып, көрерменге ерекше етіп жеткізе білгендігін де қоса айтты.
Барлық жүлдегерлерге ақшалай сыйлықтармен бірге гүл шоқтарын табыс етті.
Балнұр Қуанышқызы,
Теректі ауданы
zhaikpress.kz
