17.01.2022, 15:30
Оқылды: 98

Батыс Қазақстанда инфекциялық стационарда жатқандар саны 150-ден асты

Батыс Қазақстан облысында 504 төсектік 8 инфекциялық стационарда 154 науқас емделіп жатыр, деп хабарлайды ҚазАқпарат тілшісі.

1

БҚО денсаулық сақтау басқармасы мәлім еткеніндей, өңірде коронавирус жұқтырғандар саны күрт көбейіп, ауруханалар 30,2 пайызға толды.

Ауырғандардың бәрі де Орал қаласындағы 4 стационарда. Соның ішінде төртеуінің жағдайы ауыр. Олардың біреуі инвазивті жасанды тыныс алу аппаратына, екеуі инвазивті емес осындай құрылғыға, тағы біреуі оттегі концентраторына қосылған.

Облыста 2184 (1309-ы инфекциялық, 875 карантиндік) резервтік төсек-орын әзірленді.

Өткен жылы 684 адам коронавирустан көз жұмса, биыл 4 науқас қайтыс болды.

Жыл басынан бері 1348 адамнан індет табылса, соның 35-і – балалар.

Басқармадан түскен мәліметке қарағанда, вакцинация басталғаннан бері 259 756 адам (егілуге жататын тұрғындардың 62,6 пайызы) бірінші, 245 777-сі (59,3 пайызы) екінші компонентпен егілді.

Қазіргі кезде өңірде 60 878 доза бірінші, 80 513 доза екінші компонент бар.

Ревакцинациядан 26 347 адам өтті. Pfizer вакцинасын 6564 адам салдырса, соның 233-і – жүкті, 2890-ы – бала емізетін әйелдер, 3441-і – жасөспірімдер.

 

 

Узнайте первым о важных новостях Западного Казахстана на нашей странице
в Instagram и нашем Telegram - канале