Экология: 50 ірі кәсіпорынды озық технологияларға ауыстыру көзделуде

ҚР Экология, геология және табиғи ресурстар министрі Мағзұм Мырзағалиев мәжілісмендер алдында Экологиялық кодексінің жобасын қорғады.

««Ластаушы төлейді» қағидатының негізіне ластануды болдырмау мен бақылау бойынша шаралар жатады. Сонымен қатар қоршаған ортаға тиген залалды қалпына келтіруге қатысты жауапкершілік қарастырылған. Осылайша мемлекет табиғат пайдаланушыларға экологиялық айыппұл төлеудің орнына қоршаған ортаға теріс әсерді болдырмау жөніндегі барлық шараларды қабылдау тиімдірек болатындай жағдай жасауы тиіс. Бұдан басқа экологиялық залал орын алған жағдайда табиғат пайдаланушы қоршаған ортаны бастапқы қалпына келтіруге міндетті», - деді Мағзұм Мырзағалиев Парламент Мәжілісінің жалпы отырысында.

Оның айтуынша, ең озық қолжетімді технологияларды енгізу шартымен бірінші санаттағы нысандар үшін кешенді экологиялық рұқсаттарға көшуі тиіс. Сондай-ақ жаңадан іске қосылатын кәсіпорындар үшін кешенді экологиялық рұқсаттар алу міндеттілігі қарастырылды.

«Ең озық қолжетімді технологияларды енгізудің арқасында еліміздегі экологиялых ахуал жақсарады. Бірінші кезеңде мұнай-газ, тау-кен металлургиясы, химия және электр энергетикасы салаларына қатысты 50 ірі кәсіпорынды ең озық қолжетімді технологияларға ауыстыру жоспарланған. Айта кетерлігі, осы 50 кәсіпорынға жалпы ластанудың сексен 80 пайызы тиесілі. Кодекстің жобасында бірінші санаттағы ірі кәсіпорындарға қатысты қоршаған ортаға әсерді бағалауды (ОВОС) жүргізу туралы талап қарастырылды. Олардың тізбесі қайта қаралып, негізінен экологиялық қауіпті нысандарға баса назар аударылатын болады», - деді ол.

zhaikpress.kz