Дәл қазір Үкіметте Қазақстан Үкіметінің отырысы өтіп жатыр.
Отырыста министрлер 2023 жылғы қаңтар-қазан айларындағы әлеуметтік-экономикалық даму қорытындыларын және республикалық бюджеттің атқарылуын баяндап жатыр.
Ұлттық экономика министрі Әлібек Қуантыровтың баяндауынша, есепті кезеңді Қазақстан экономикасының өсу қарқыны 4,9%-ті құрады.
Үкімет баспасөз қызметінің хабарлауынша, оң динамика нақты секторда– 3,8%, қызмет көрсету саласында – 5,4% өскен.
Салалар арасында ең жоғары өсуді құрылыс, сауда, ақпарат және байланыс, сондай-ақ көлік көрсеткен.
Негізгі капиталға салынған инвестициялардың өсу қарқыны 12,6% құраған.
Инвестициялар ағыны көлік және қоймалауда – 58%, денсаулық сақтауда – 40%, саудада – 38%, білім беруде – 18%, ауыл шаруашылығында – 8,7%, өнеркәсіпте – 8,3% өсті.
Алдын ала қорытынды бойынша қаңтар-қыркүйекте сыртқы сауда тауар айналымы 2,4%-ке өсіп, 102 млрд долларды құрады.
Экспорт 57 млрд-тан астам долларды құрап, оның ішінде өңделген тауарлар экспорты 18 млрд долларға жеткен. Тауарлар импорты 44 млрд-тан астам долларды құрады.
Оң сауда балансы 13 млрд долларға тең.
