Облыс әкімі Нариман Төреғалиевтің төрағалығымен Сыбайлас жемқорлыққа қарсы іс-қимыл мәселелері жөніндегі аймақтық комиссияның отырысы өтті. Күн тәртібінде білім саласындағы сыртқы талдау қорытындылары, сыбайлас жемқорлық тәуекелдерінің алдын алу, мүдделер қақтығысын болдырмау және мемлекеттік сатып алу рәсімдерінің ашықтығын қамтамасыз ету мәселелері қаралды.
Білім беру саласындағы сыртқы талдау нәтижесінде ұсынылған шаралардың орындалу барысы назарға алынды. Тәуекелдердің алдын алу жұмыстарын жүйелі жүргізу, биометриялық жүйелерді кезең-кезеңімен енгізу, сондай-ақ мектеп асханаларының жалға берілген аумағын нақтылап, шарттарды нақты пайдаланылатын көлемге сәйкестендіру міндеттері белгіленді.
Мемлекеттік қызметтегі әдеп пен заңнама талаптарының сақталуына ерекше мән берілді. Мүдделер қақтығысына жол бермеу, кадрлық шешімдер қабылдау кезінде заң талаптарын сақтау және мемлекеттік аппараттың ашықтығын қамтамасыз ету бойынша алдын алу шараларын күшейту қажеттігі айтылды.
Мемлекеттік сатып алу бағытында бәсекелестікті арттыру, жоспарлау сапасын жақсарту және техникалық ерекшеліктерді әзірлеу кезінде ашықтық қағидаттарын сақтау мәселелері көтерілді. Сатып алу рәсімдеріндегі тәуекелдерді тұрақты бағалау және ішкі бақылау тетіктерін жетілдіру бойынша жауапты органдарға нақты міндеттер жүктелді.
Жиын қорытындысында мемлекеттік органдарға сыбайлас жемқорлық тәуекелдерін ерте анықтауға және олардың алдын алуға бағытталған жұмысты күшейтіп, белгіленген шаралардың уақтылы орындалуын қамтамасыз ету міндеттелді.
БҚО әкімінің баспасөз қызметі
