Ұлыбританияда ковидтің жаңа түрі тарап, дәрігерлердің алаңдаушылығын туғызды. Ресми мәліметтерге сәйкес Англия мен Шотландияда әрбір 24-ші адам вирусты жұқтырған, деп хабарлайды Kazinform тілшісі.
Фото: Pexels
Шамамен 150 мың адам үйден тест сынамасын жасап, осындай нәтиже көрсетіп отыр. Вирустың жас талғамайтыны анықталған.
Бірақ ол 65 жастан асқан адамдардан гөрі 18 бен 44 жас аралығындағы тұрғындардан көбірек табылған. Науқастар, әсіресе, Лондонда көп.
Дүниежүзілік денсаулық сақтау ұйымы бұл вирусты зерттеуді қажет ететін омикронның жаңа түрі деп, оған JN.1 деген атау берді.
Оның Солтүстік және Оңтүстік Америкада, Тынық мұхитының батыс бөлігінде және Еуропа елдерінде кеңінен тарағаны белгілі болып отыр.
“Ковид, әдеттегіше, бізді таң қалдырып жатыр. Алдын ала болжау қиын ауру болғандықтан сақтық шараларын жасаған жөн”, - дейді вирусолог ғалым Лоуренс Янг.
Қазіргі таңда JN.1 аса қауіпті екендігін дәлелдейтін әзірге зерттеу нәтижелері жоқ.
Ковидке қарсы вакциналардың жаңартылған түрлері адам ағзасының иммунитетін күшейтеді дейді мамандар.
Бірақ Дүниежүзілік денсаулық сақтау ұйымындағылар науқастар санының артуы мүмкін екендігін жоққа шығармайды.
Өйткені қыс мезгілінде өршитін басқа вирустық және бактериалды инфекциялар жығылғанға жұдырық болып тұр.
