Өздеріңізге мәлім қыркүйек айының 21-інде Бөкей ордасы ауданы Бөрлі ауылында тұрғын үй өртке оранып, айдың күні аманында тұтас бір отбасы баспанасыз ғана емес, киім-кешексіз, құжатсыз далада қалып еді.
Күл-талқаны шыққан үйдің иесі жалғызбасты көпбалалы ана Ақтолқын Зайноллинаға бөрліліктер ғана емес, аудан жұрты бір кісідей жұмылып, көмек қолын созуға тырысты. Қайырымдылықтың үлкен-кішісі болмайды дегендей, қиындыққа тап болған жанұяға мәметовалық өрендер мен ұстаздары да өз септіктерін тигізуге ниет қылып жәрмеңке өткізіп еді.
Аудан әкімдігі тарапынан да мұқтаж отбасына көмек көрсету шаралары ұйымдастырылып, күні кеше аудан әкімінің орынбасары Кенесары Нұршинов бастаған топ баспанаға қажетті дүниені арнайы барып табыстады.
– Сайқын ауылының тұрғындарының атынан жиһаз, газ плитасы, теледидар, кір жуғыш машина, ыдыс аяқ, тағы басқа да тұрмыстық қажетті тауарларды игілігіңізге ұстаңыз. Қайырымдылық дегеніміз – өзіңдегі бар жақсылықты өзгемен шынайы әрі риясыз көңілмен бөлісе алу деп ойлаймын. Ол материалдық немесе моральдық тұрғыда болсын, бастысы шын ниетпен жасалынған әрбір қайырлы амалды қайырымдылық деп білеміз. Қайырымдылық жасау – әрбір адамның адами парызы, – деді.
Өз кезегінде Ақтолқын Зайноллина жоғын түгендеп, көмек қолын созған ағайынға ризашылығын білдіріп, жасаған жақсылықтары жүз есе қайтып, бақытты ғұмыр кеше бергей деп ақжарма лебізін жеткізді.
Нұрай Таубай,
Бөкей Ордасы ауданы
zhaikpress.kz
