Теректі ауданына жұмыс сапарымен БҚО әкімі Нариман Төреғалиев келді. Өңір басшысын Теректі ауданы әкімі Тілек Габдушев қарсы алып, аудан аумағында атқарылып жатқан бірқатар жұмыстармен таныстырды.
Ең алдымен облыс әкімі Подстепное ауылындағы 13 көппәтерлі тұрғын үйлердің құрылыс барысын көзбен көрді. Теректі ауданы соның ішінде, Подстепное ауылдық округінде халық санының өсуіне байланысты күн тәртібінен түспейтін мәселелердің бірі – халықты жаңа тұрғын үйлермен қамту. Сол себепті былтыр жазда бірінші қабатында тұрғын емес үй-жайлары бар 3 қабатты 7 көппәтерлі тұрғын үйдің және құрама-монолитті қаңқалы (сыртқы желілері жоқ) 4 қабатты 6 көппәтерлі тұрғын үйлер құрылысы басталды. Құрылыстың нормативтік мерзімі бойынша нысан 17 ай ішінде аяқталуы тиіс. Бұл жөнінде мердігер компания «Жаиксельстрой» ЖШС өкілдері хабарлады. Келісімшарттың жалпы соммасы (мемлекеттік сатып алу қорытындысы бойынша) – 4 млрд 950 млн теңгені құрайды. Өңір басшысы жүргізіліп жатқан жұмыстардың сапасына ерекше назар аудара отырып, құрылыс қарқынын арттыруды тапсырды.
Одан кейін Нариман Төреғалиұлы Ақсуат ауылдық округіне қарасты Пойма ауылында салынып жатқан мектеп құрылысына барды. Ауыл тұрғындары үшін мектеп құрылысы – елеулі оқиға. Ауданға келген облыс басшылығы яки депутаттардан халық әрдайым жаңа мектеп сұрап келді. Себебі, Пойма ауылының оқушылары осы уақытқа дейін 1960 жылдары салынған ескі ғимаратты бейімдеп жабдықтаған мектепте оқып келген болатын. Қазіргі таңда 108 орындық мектеп құрылысы басталып кетті. Құрылысқа жауапты мердігер – «КА-Строй ЛТД» ЖШС. Өткен жылы тамыз айында басталған әлеуметтік нысанның құрылысы қарқынды жүріп жатыр. Мердігер компания өкілдері құрылысты биыл тамыз айында аяқтап, пайдалануға беруді жоспарлап отыр.
Теректі ауылдық округіне қарасты Жайық ауылындағы жаңа медициналық пункт те халық игілігіне берілгені күні кеше еді. Ескі медициналық пункт авариялық жағдайда болуына байланысты тұрғындар тарапынан жаңа нысан салу бойынша ұсыныс көтеріліп келген болатын. Аталмыш нысанның құрылысы 2022 жылдың қазан айында басталған. Ғимаратты ЖШС «Баталасу» медігер компаниясы салыпты. Құрылысқа 52 млн теңге көлемінде қаражат жұмсалған. Бүгінгі таңда Жайық медициналық пункті 422 адамға қызмет көрсетеді.
Батыс Қазақстан облысының ауданға жұмыс сапары Теректі ауылындағы мәдениет үйінде жалғасты. Онда облыс әкімі теректіліктермен жүздесіп, аудан әкімінің атқарылған жұмыстар бойынша есебін тыңдады. Мәдениет үйі фойесінде мемлекеттік грант көмегімен өз жобаларын жүзеге асырған кәсіпкерлер өңір басшысымен тілдесіп, инвестициялық жобалар таныстырылды.
Өз сөзінде Теректі ауданы әкімі Тілек Александрұлы ауданның алға қойған мақсаттарымен қатар, өзекті мәселелерді де тілге тиек қылды.
Аудан әкімі тұрғындарды баспанамен қамту күн тәртібінен түспейтінін мәлімдеді. Расымен, баспанамен қамту - тұрғындар тарапынан жиі көтерілетін мәселелердің бірі. Аудан бойынша тұрғын үй кезегінде 1278, тұрғын үй салу үшін жер учаскесіне – 14 997 адам тұр. Өткен жылы Тоқпай ауылы маңынан 120 пәтер «Отбасы банк» салымшыларына табысталған еді. Биылғы жылы тағы да осындай 120 пәтер тапсыру жоспарда бар. Сонымен қатар Жаңа Өмір ауылынан 24 пәтер иелеріне табысталмақ.
Жиынға келген теректіліктер тарапынан да сауалдар қойылды. Мысалы, Төңкеріс ауылының тұрғыны Т.Момот ауылға кіреберіс жолды күрделі жөндеуден өткізу мәселесін көтерді. Подстепный ауылының тұрғыны Р.Бектеміров ауылға тағы бір мектеп керектігін алға тартса, ауданның құрметті азаматы С.Қоқашев аудан орталығындағы ауыз судың сапасын тілге тиек қылды. Тағы бір ауданның құрметті азаматы М.Төлегенов ұрпақ тәрбиесіне тоқталып, аудандағы мәдени ошақтардың жұмысын сынға алды.
Халықпен кездесуден кейін Нариман Төреғалиев жеке мәселесімен келген азаматтарды қабылдады. Қабылдауға облыс әкімімен бірге құқық қорғау органдары мен облыстық басқарма басшылары да қатысты.
Әділет Орынбасарұлы,
Теректі ауданы
zhaikpress.kz
