Переметный ауылында «Желтоқсан оқиғасы – Тәуелсіздік айғағы» деген атаумен Желтоқсан құрбандарын еске алу кеші өтті.
Іс-шара басында 1986 жылы қаза болған жазықсыз жастарды еске алу үшін бір минут үнсіздік жариялады.
Кешті ашқан Бәйтерек аудандық ардагерлер кеңесінің төрағасы Мәлік Өтешов осыдан 38 жыл бұрын Алматының бас алаңына жиналған жастардың мақсаты тәуелсіздікке қол жеткізу болғанын атап өтті. Бұл оқиғаға байланысты 103 адам жауапқа тартылса, оның 99-ы сотталды. Алматы қаласы бойынша 2401 адам қамауға алынып, оқудан 309 студент шығарылған. 99-ның ішінде 2 адам өлім жазасына кесілді. «Өмір-өзен толқындары сол кезден бізді алыстатып бара жатса да жүрегімізде мәңгі ұмытылмас бір нәрсе қалды,- деді Мәлік Сейсенбайұлы.- Ол – дүниені дүр сілкіндірген қазақ қыздары мен ұлдарының рухына, ерлігіне деген тағзым, құрмет. Біздің ең киелі, қасиетті, баға жетпес байлығымыз – Тәуелсіздік. Өз өмірлерін құрбан етіп, болашағымызды жарқын еткендері үшін оларға қарыздармыз».
Кеш барысында аудандық мәдениет үйінің өнерпаздары Желтоқсан әндерін шырқады.
Сәнім Берік
Бәйтерек ауданы
