«Senіm» сыйлаған мереке

Балаларды қорғау күні мерекесіне орай Бөкей ордасы аудандық аурухана алдында ақхалаттылардың бүлдіршіндеріне және емханаға келген балаларға арналып көңілді шаралар ұйымдастырылды.

Мерекеге ертелетіп келген балаларды аудандық аурухана қызметкерлерінің «Senim» қоғамдық ұйымының төрайымы Назгүл Жұмағалиева және салауатты өмір салтын сақтау медбикесі Альфия Махимова мерекемен құттықтады.

Алдымен балаларға дене шынықтыру жаттығуларын орындатып, кейін «Тышқан мен мысық» ойыны ойнатылды. Мерекеге арнайы шақырылған аниматорлар ойынды қыздырып, тысқары тұрған балаларды ортаға шақырып, мерекелік нышан сыйлады. Ертеңгілік барысында танымдық тренингтер өтіп, балғындар асфальтқа суреттерді салды. Шараларда белсенділік танытқандар түрлі сый-сияпатқа ие болса, осы шараға келген әр балаға балмұздақ берілді.

Айта кетелік, балаларға арналған бұл мереке аудандық аурухана қызметкерлерінің «Senim» қоғамдық ұйымының ұйымдастыруымен өтті.

Раушан Жанатқызы,
Бөкей ордасы ауданы
zhaikpress.kz