Сырым ауданына келген меймандар Жымпитының тарихымен қоса, тазалығын да айтып жатады. Көшелердің көрікті, ауылдың ажарлы болуына еңбекқор ұжым – «EPNUR» ЖШС-ның үлкен үлесі бар.
2019 жылы Жымпиты ауылындағы қатты тұрмыстық қалдықтар полигоны «EPNUR» ЖШС-на сенімгерлік басқаруға берілді. Бүгінгі таңда полигон аумағы реттелді. Экологиялық талапқа сай көше контейнерлерінен шығатын қатты тұрмыстық қалдықтар бөлек жиналуда.
Нұржан Бисенғалиев басқаратын серіктестік «Бизнестің жол картасы 2020-2025» бағдарламасы бойынша 4 млн 224 мың теңге грант ұтып алып, 2021 жылы пластик құтыларды престеу аппаратын іске қосты.
"Pressmax 530" құрылғысы бір буғанда 100 келі пластик пен қатырма қағазды жапыруға қауқарлы. Престелген өнімдерді Орал қаласындағы «Грин Сервис Компани» ЖШС-мен келісімшарт жасалды. Қалдықтардың 1 келі бағасы 90 - 110 теңге аралығында.
Нариман Төреғалиев жымпитылық кәсіпкердің бастамасына қолдау білдіріп, болашақта ауданның барлық ауылын қамту туралы ұсыныс айтты.
Сырым ауданының әкімі Төлеген Төреғалиевтің айтуынша, округ орталықтарының көшелеріне контейнер қою жоспарлануда.
Қалдықтарға "екінші өмір" сыйлайтын шағын кәсіпорын 6 адамды тұрақты жұмыспен қамтып отыр.
Бауыржан Ширмединұлы,
Фото: Айжан Амангелдина,
Сырым ауданы
zhaikpress.kz
