Жас волейболшылар жарысы өтті

Мектеп оқушылары арасында ел егемендігін ұлықтай отырып, бұқаралық спортты дамыту, жасөспірімдерді салауатты өмір салтын ұстануға шақыру және волейбол ойынына деген қызығушылықты арттыру мақсатында Бәйтерек ауданында түрлі жарыстар ұйымдастырылуда. Турнирлерде ауданға қарасты мектептерден келген оқушылар бақ сынайды. Соның арқасында жас ойыншылардың шеберлігі шыңдалып, ойын тәжірибесі көбейеді.​

Осы мақсатта жуырда ел Тәуелсіздігінің 30 жылдығына орай Зеленов мектебі қабырғасында 7-8 сынып оқушылары арасында волейбол турнирі өтті. 

Сынға қатысушылар өздерін жақсы жағынан көрсетіп бақты. Оқушылар спортқа бір табан жақын екендерін дәлелдеп, мектептерінің намысын жықпау үшін қызу ойын өрнегін көрсетті.

Қорытындысында егіндібұлақтық волейболшылар үшінші орынға ие болса, жергілікті Зеленов мектебі құрамасы екінші орынды еншіледі. Ал І.Есенберлин атындағы білім ордасының командасы топ жарды.

Жарыс жеңімпаздары мен ойын барысында ерекше көзге түскен үздік ойыншыларға диплом, медальдармен қатар естелік сыйлықтар табыс етілді.

Назерке Сыйлыбаева,​
Бәйтерек ауданы​

zhaikpress.kz