Жуырда «Шабыт» мектептен тыс жұмыс орталығында қазақтың ұлттық ойыны тоғызқұмалақтан алғаш рет 2008 жылы туған және одан кіші жасөспірім қыздар арасында Орал қаласының ашық біріншілігі ұйымдастырылды.
Тасқала ауданында ұлттық ойынымыз жылдан-жылға дамып, қарқыны өсіп келеді.
Бұрымдылардың арасында өткен жарысқа 9 команда, 50-ге жуық спортшы қатысты.
Сырым, Бөрлі, Бәйтерек, Жаңақала, Тасқала аудандары және Орал қаласы, “ОРАЛ” спорт клубы, №1 ЖОББМ, Эстетикалық бағыттағы гимназия қатысты. Екі күнге созылған жарыс тартысты өтті.
Бабы мен бағы жанғандар ұпайын алып, командасын алға сүйреді. Осылайша І орынға Орал қаласының командасы ие болса, ІІ орын Жаңақала командасына, ал ІІІ орын Тасқала ауданының командасына бұйырды.
Команда құрамында Гүлзира Мұқашева, Асылжан Ыдырыс, Ләйла Қадірберлі, Жанна Сағидолла, Аружан Ғабдісыйық, Жанел Едрес, Адия Мұратова бар.
Жоғарғы санатты жаттықтырушы Әділбек Исламғалиев дайындаған шәкірттері абырой биігінен көріне білді.
Тасқала ауданының БЖСМ әдіскері Гүлсім Бермұқанова
