Нысана көздеуден Ұлттық құрама спортшысы Никита Чирюкин Оңтүстік Кореяның Чханвон қаласында өтіп жатқан жасөспірімдер арасындағы əлем чемпионатында жеңіске жетті. Бұл туралы Спортты дамыту дирекциясының баспасөз қызметі хабарлады.
Отандасымыз кіші калибрлі тапаншамен 25 метрден оқ атуда қарсылас шақ келтірген жоқ. Жеңімпаздың бапкері - Рашид Юнусметов.
Қытайлық Чжан Чжихао күміс жүлдеге ие болса, үздік үштікті жарыс қожайыны Сук Джин Хонг түйіндеді.
Қазір Қазақстан құрамасы 1 алтын медальмен жалпы есепте 8-орынға көтерілді.
Чханвондағы əлем чемпионаты 25 шілдеде аяқталады. Биыл бəсекеге 45 елден 600-ден астам спортшы жиналды.
