Заңгер, облыстық қоғамдық кеңестің және мемқызмет әдеп кеңесінің мүшесі, «Әділдік жолы» РҚБ-ның БҚО филиалының өкілі Бауыржан Зәкиұлы мемлекеттік сатып алуға мониторинг жасау курсын бастады.
Заңгердің «Жемқорлыққа қарсы волонтерлік» жобасы аясында өтіп жатқан дәрісіне сыбайлас жемқорлыққа қарсы түрлі құзырлы органдардың мамандары, қоғам белсенділері, үкіметтік емес ұйым өкілдері, экобелсенділер, журналистер қатысып жатыр.
Курстың ашылуында Сыбайлас жемқорлыққа қарсы іс-қимыл агенттігінің БҚО-дағы департаменті өкілі Ринат Мұратов «Әділдік жолы» РҚБ-ның БҚО филиалымен бірлесе жұмыс жасайтынын айтып, курсқа сәттілік тіледі.
-Курста goszakup.gov.kz порталына талдау жүрізіп, мемлекеттік бюджеттің тиімді жұмсалуын бақылауды үйретеміз. «Әділдік жолы» РҚБ-ның БҚО филиалы мамандары 100 мекеменің 2 мыңнан астам мемсатып алу құжатын талдадық. 2022 жылы бюджетке 33,3 млн теңге, биыл 19,3 млн теңге қайтардық. Біздің сараптамаларымыз арқылы 79 тұлғаға әкімшілік құқық бұзушылық туралы іс қозғалды. Оның 8-і қысқарса, қалған істер бойынша 71 тұлғаға 20,6 млн айыппұл салынды. Халықтың салығынан құралған бюджеттің тиімді жұмсалуын қадағалау, талап ету – қоғамдық бақылау. Курсты өткізудегі мақсатымыз – қоғамдық бақылаушыларды даярлау, қоғам белсенділеріне сауатты мониторинг жасауды үйрету, жемқорлыққа қарсы іс-әрекетті жетілдіру, заңдарға ұсыныстар енгізу, - дейді Бауыржан Зәкиұлы.
Нұрлыбек Нұрланұлы,
zhaikpress.kz
