Шыңғырлау ауданында «Әділет» партиясы Батыс Қазақстан облыстық сайлауалды штабы мүшелерінің тұрғындармен кездесуі өтті. Жиынға облыстық штаб мүшелері Мұрат Мұқаев, Балжан Сұлтанова, Бауыржан Жантілеуов қатысты.
Кездесу барысында еліміздің қазіргі даму бағыты, қоғамдық-саяси тұрақтылық, әлеуметтік-экономикалық жаңғыру және алдағы кезеңнің басым міндеттері кеңінен сөз болды. Әсіресе, Мемлекет басшысының Қазақстан халқына Жолдауында айқындалған мақсат-міндеттер мен оларды жүзеге асыру жолдарына назар аударылды.
Қатысушылар Қазақстанның халықаралық аренадағы орны мен беделі, елдің тәуелсіздігін нығайту, ұлттық мүддені қорғау және жаһандық өзгерістер жағдайында бәсекеге қабілетті мемлекет қалыптастыру мәселелерін талқылады. Бүгінде әлемдік геосаяси ахуал күрделеніп, экономикалық байланыстар мен технологиялық даму жаңа сипат алып отырған кезеңде ел ішіндегі бірлік, саяси тұрақтылық пен тиімді мемлекеттік басқарудың маңызы арта түскені атап өтілді.
Кездесуде «Әділет» партиясының бағдарламалық бағыттары да назардан тыс қалмады. Партия ұстанымындағы әлеуметтік әділеттілік, заң үстемдігі, азаматтардың құқықтарын қорғау, мемлекеттік басқарудың ашықтығы және қоғам алдындағы жауапкершілік мәселелері сөз болды.
Сонымен қатар, тұрғындарды толғандыратын әлеуметтік қорғау, қолжетімді баспана, жол және инженерлік инфрақұрылым, экологиялық ахуал, ауылдық аумақтарды дамыту мәселелері қозғалды. Аталған бағыттар елдің әлеуметтік-экономикалық тұрақтылығын қамтамасыз етуде маңызды рөл атқаратыны айтылды.
Жиында білім беру мен ғылымды дамыту, жас ұрпаққа сапалы білім беру, отандық өндірісті қолдау және цифрлық технологияларды кеңінен енгізу мәселелеріне де ерекше мән берілді. Әсіресе, жасанды интеллект дәуірінде адами капиталды дамыту, ғылыми әлеуетті арттыру және жаңа технологияларды экономиканың түрлі саласына тиімді пайдалану- уақыт талабы және маңызды міндеттер екені атап өтілді.
Кездесу барысында штаб мүшелері партияның бағдарламалық басымдықтары мен алдағы кезеңге арналған міндеттер жөнінде ақпарат беріп, тұрғындарды толғандырған мәселелерге қатысты пікір алмасты.
Қоғам мен саяси ұйымдар арасындағы ашық диалогты дамыту, азаматтардың ұсыныс-пікірлерін тыңдау және ел дамуына қатысты өзекті мәселелерді ортақ талқылау аталмыш кездесудің негізгі мақсаты болды десек те болады.
Дайындады: «Әділет» партиясы
Батыс Қазақстан облыстық
филиалының баспасөз қызметі
Тапсырыс беруші: Бектұрған Б.О.
Батыс Қазақстан облыстық мәслихаты
депутаттарының сайлауында партиялық
тізімді ұсынған «Әділет» партиясы» ҚБ
сайлау қорының қаражатынан төленді
