ҚР Денсаулық сақтау министрлігінің мәліметінше, 2026 жылдың алғашқы жеті айында елдің медициналық авиациясы 1 308 ұшу орындап, шұғыл көмекке мұқтаж 1 353 пациентті тасымалдады. Сонымен қатар мамандар өңірлік ауруханалар үшін 4 мыңнан астам қашықтан медициналық консультация өткізді.
Фото: istockphoto.com
Ауыр жарақаттар, инфаркт, асқынған босану жағдайлары және шалғай елді мекендердегі тұрғындарға шұғыл жәрдем көрсету бағытында атқарылған бұл жұмыстар еліміздегі шұғыл медициналық көмек жүйесінің негізгі буыны болып қала береді. Жыл басынан бері шетелде жүрген Қазақстан азаматтарына көмек көрсету үшін Албания, Италия, Түркия, Қытай, Таиланд, Ресей және Өзбекстан аумақтарына 9 санитариялық авиациялық ұшу жүзеге асырылды.
Медициналық авиацияны одан әрі дамыту, пациенттерді бағыттау жүйесін жетілдіру және заманауи технологияларды енгізу жоғары мамандандырылған көмектің қашықтыққа қарамастан барлық тұрғынға қолжетімді болуын қамтамасыз етеді.
