Шығыс Қазақстан облысы Марқакөл ауданында полицияның ұйымдасқан қылмысқа қарсы күрес басқармасы мен ҰҚК департаменті бірлесіп ауқымды операция жүргізді, деп хабарлайды ҚР ІІМ баспасөз қызметі.
Фото: gov.kz
Жедел іс-шаралар нәтижесінде қорық аумағында Қызыл кітапқа енгізілген балық түрлерін заңсыз аулаумен айналысқан алты адамнан құралған қылмыстық топтың жолы кесілді. Күдіктілер — 23 пен 50 жас аралығындағы жергілікті тұрғындар.
Марқакөл және Урунхайка ауылдарында жүргізілген тінту барысында олардан бағалы балық түрлерінің, соның ішінде ускуч пен хариустың 700 келіден астам еті, сондай-ақ 200 литрден астам ускуч уылдырығы тәркіленді. Бұдан бөлек күдіктілерден тыйым салынған аулар, радиостансалар мен оқ-дәрілер табылды.
Аталған факті бойынша сотқа дейінгі тергеп-тексеру басталып, сот санкциясымен күдіктілер үйқамаққа алынды. Қазіргі уақытта қылмыстың барлық мән-жайын анықтау мен заңсыз өнімді өткізу арналарын белгілеуге бағытталған тергеу шаралары жүріп жатыр.
