Синоптиктер болжамы: Биыл қыста ауа райы қандай болады?

Синоптиктер болжамынша, Қазақстанда 2026-2027 жылдардағы қыс салыстырмалы түрде жылы әрі жауын-шашын мөлшері орташа деңгейде болады. Кей жерлерде боран соғып, жел екпіні күшейеді. Сондай-ақ көктайғақ пен тұман болуы ықтимал. Температураның құбылуына байланысты қар жамылғысының бетінде мұз қабаты пайда болуы мүмкін.

Желтоқсан айы

Желтоқсан айында еліміздің барлық аумағында ауаның орташа температурасы климаттық нормадан 2°С жоғары болады деп күтіліп отыр. Республиканың басым бөлігінде жауын-шашын мөлшері норма шамасында болады.

Ал нормадан көп жауын-шашын мына өңірлерде күтіледі:

• Солтүстік Қазақстан облысында;
• Павлодар облысының басым бөлігінде;
• Қостанай және Ақмола облыстарының солтүстік жартысында;
• Батыс Қазақстан және Ақтөбе облыстарының солтүстігінде;
• Абай және Шығыс Қазақстан облыстарында;
• Солтүстік-батыс және солтүстік-шығыс өңірлердің кейбір аудандарында.

Қызылорда облысының оңтүстігінде жауын-шашын мөлшері нормадан аз болады.

Қаңтар айы

Қаңтарда республиканың басым бөлігінде ауа температурасы климаттық нормадан 1-2°С жоғары болады. Ал елдің солтүстік-батыс бөлігінде температура норма шамасында сақталады. Атап айтқанда, Батыс Қазақстан облысында, Атырау, Ақтөбе, Қостанай және Солтүстік Қазақстан облыстарының басым бөлігінде, сондай-ақ Ақмола облысының солтүстік-батыс жартысында ауа температурасы қалыпты деңгейде болады. Еліміздің басым бөлігінде жауын-шашын мөлшері норма шамасында күтіледі.

Нормадан көп жауын-шашын:

• Батыс Қазақстан облысының оңтүстік-батысында;
• Атырау облысының батысында;
• Маңғыстау облысының батысында болжанады.

Ал жауын-шашын мөлшері нормадан аз болатын өңірлер:

• Қызылорда облысының оңтүстік-шығыс бөлігінде;
• Ұлытау облысының қиыр оңтүстік-шығысында;
• Қарағанды және Абай облыстарының қиыр оңтүстігінде;
• Түркістан, Жамбыл, Алматы және Жетісу облыстарының солтүстік жартысында.

Ақпан айы

Қыстың соңғы айында республиканың басым бөлігінде ауа температурасы климаттық нормадан 1–3°С жоғары болады деп күтіледі. Ал солтүстік және шығыс өңірлерде температура норма шамасында сақталады. Олардың қатарында Солтүстік Қазақстан, Шығыс Қазақстан облыстары, Павлодар облысының басым бөлігі, Абай облысының солтүстік-шығыс жартысы, Қостанай және Ақмола облыстарының солтүстігі бар. Ақпан айында еліміздің басым бөлігінде жауын-шашын мөлшері нормадан көп болады деп болжанып отыр.

Жауын-шашын мөлшері норма шамасында болатын өңірлер:

• Батыс Қазақстан және Атырау облыстары;
• Түркістан облысы;
• Ақтөбе, Маңғыстау, Қостанай және Қызылорда облыстарының басым бөлігі;
• Ұлытау облысы;
• Ақмола облысының қиыр оңтүстік-батысы;
• Қарағанды және Жамбыл облыстарының қиыр батысы.

Ал жауын-шашын мөлшері нормадан аз болатын аймақтар:

• Маңғыстау облысының оңтүстік-шығыс жартысы;
• Ақтөбе облысының оңтүстігі;
• Қызылорда облысының оңтүстік-батысы.