Ұлыстың ұлы күні Наурыз мейрамы қарсаңында Қазақстан Республикасының Ұлттық ұланының Орал қаласында орналасқан 5517 әскери бөлімінде сарбаздардың арасында «Жігіт сұлтаны» байқауы өтті.

ҚР ҰҰ «Батыс» өңірлік қолбасшылығының баспасөз қызметінің хабарлауынша, серілер сынына білекті де жүректі 6 жігіт қатысып, өзара мықтыны анықтады. Бұл шара жігіттерді тапқырлыққа, шешендікке, батырлыққа тәрбиелеу мақсатында өткізілді. Байқауға қатысушылар өзін-өзі таныстыру, өз өнері, гір тасын көтеру, қол күрес және салт дәстүрден қойылған сұрақтарға жауап беру бойынша бақтарын сынады.

Сайыс барысында жауынгерлер өз өнерлерін ортаға салды. Бес кезең бойынша өткен сайыстың қортындысы бойынша 1-орынға әскери бөлімнің жауынгерлік қамтамасыз ету ротасының сарбазы, қатардағы Бекзат Назаров қол жеткізіп, әскери бөлім жігіттерінің сұлтаны атанса, 2-орынды материалдық-техникалық қамтамасыз ету ротасының жауынгері, қатардағы Асылбек Жағыппарұлы қол жеткізді, ал жүлделі 3-орынды жедел мақсаттағы ротасының сарбазы, қатардағы Бекзат Қосалиев иеленді.

- Осындай шараны сарбаздардың арасында өткізудің маңызы зор. Мұндай сайыс сарбаздарды болашаққа бағыттап, батылдық пен шымырлыққа тәрбиелейді дейді, - сегіз қырлы, бір сырлы жігіттердің өнеріне төрағалық еткен бөлім командирінің тәрбие және әлеуметтік-құқықтық жұмыстар жөніндегі орынбасары подполковник Жәнібек Сарсенов.
Шара соңында әскери бөлімнің әйелдер кеңесі сарбаздарға арнап мерекелік дастархан жайып, шашу шашып, бауырсақ пен наурыз көже таратты. Сондай-ақ сайыс қортындысы бойынша үздік деп танылған жеңімпаздар мен қатысушыларға грамоталар мен бағалы сыйлықтар табыс етілді.

zhaikpress.kz