Қадыр Мырза Әлі атындағы мәдениет және өнер орталығында Қазақстан Журналистер одағының мүшесі, ақын Қыдыр Абдрахмановтың «Өмір мектебі» атты кітабының таныстырылымы өтті.
Ең әуелі облыстық мәдениет, тілдерді дамыту және архив ісі басқармасы басшысының орынбасары Қуанышбек Мұқанғалиев кеш иесіне шығармашылық табыстар тілеп, басқарма басшысы Сайран Дүйсеновтің алғыс хатын табыс етті.
Іс-шара барысында Қыдыр Харесұлы «Өмір мектебі» атты кітабы жөнінде аз-кем ақпарат айтып, өлеңдерін оқып берді. Сонымен қатар кеш ұйымдастырушыларына ризашылығын білдірді.
М. Өтемісов атындағы Батыс Қазақстан университетінің профессоры, филология ғылымдарының кандидаты Зейнолла Мүтиев жаңа жинаққа жан-жақты талдау жасады. Содан соң Зейнолла Жақсылықұлының шәкірттері, М. Өтемісов атындағы Батыс Қазақстан университеті филология факультетінің студенттері, Орал қаласында орналасқан Д. Қонаев атындағы №44 жалпы орта білім беретін мектеп-гимназияның оқушылары, аталған мектептің қазақ тілі мен әдебиеті пәні мұғалімі Ардақ Жангелдіқызы ақын өлеңдерін жатқа оқыды.
Казталов аудандық ішкі саясат бөлімінің басшысы Айша Әбішева ақынға амандық-саулық тілеп, Казталов ауданының әкімі Рүстем Зұлқашевтің атынан алғыс хат және естелік сыйлық ұсынды. Казталов аудандық мәдениет, тілдерді дамыту, дене шынықтыру және спорт бөлімінің басшысы Берік Рақымғалиев облыстық мәслихат депутаты Самат Хасановтың Қыдыр Харесұлына тұлпар тарту еткенін хабарлады. Белгілі журналист Сырымбек Жәрдемұлы кеш иесіне «Жайық Пресс» ЖШС ұжымы атынан алғыс хат және қаржылай сыйлық (100 мың теңге) табыстады. Өз кезегінде кітаптың жарыққа шығуына атсалысқан Руслан Өтегенұлы ізгі ниет-тілегін білдірді.
Іс-шара барысында «Ағаларға сағыныш», «Әке», «Атамыз бен әжеміз», «Алау кездер – ән кездер», «Ұлыңмын мен, ауылым», «Көктем лебі», «Жалпақтал күні» атты Қыдыр Харесұлының сөзіне жазылған әндерді Қазақстан Республикасы мәдениет саласының үздігі, әнші-композитор Жаскелең Қайсағалиев, «Ерен еңбегі үшін» медалінің иегері Айбар Хайырханов, ақынның ұлы Дастан Абдрахманов, немерелері Жанарлым, Сыйлық, Нарұл Қыдырғали, «Мәдениет саласының үздігі» төсбелгісінің иегері Ақмарал Ахметова, әуесқой композитор Медеу Қуанышқалиев және әнші Бейімбет Дүйсенғалиев орындады.
Кеш соңында Қадыр Мырза Әлі атындағы мәдениет және өнер орталығы директорының орынбасары Сәуия Темірова ақынға орталық басшысының құттықтау хаты мен естелік сыйлық табыс етті.
Марлен Ғилымхан,
zhaikpress.kz
