Әлем чемпионы Өнер Сейілхан елге келген сапарында коворкинг орталығында жергілікті жастармен жүздесті. Ашық диалог форматында өткізілген шараға қос мектептің, Бөкей ордасы колледжінің шәкірттері арнайы келді.
Шараны тізгіндеген аудандық жастармен жұмыс жөніндегі ресурстық орталықтың директоры Медет Қаресов қатысушыларға сауалдарын ашық қойып, белсенділік танытуға шақырды. Боксқа қызығушылық танытқан жастар чемпионның спортпен неше жасынан бастап шұғылданғанын, жетістіктері, спорттағы жарақаттары, тіпті әлемдік додадан қандай сыйақы алғаны туралы да сұрады. Спортшыға тән байыпты да салмақты мінезімен Өнер бауырымыз барлық сұраққа жауап беруге тырысты. Жеке бапкері Берік Жарылқасынов та шәкіртінің спорттағы жетістіктері, алдағы жобалары жөнінде, еліміздегі бокс мектебінің дамуына хақында әңгіме өрбітіп, денсаулыққа мән беріп, ұйқы режимін бұзбай, салауатты өмір салтын сақтауға шақырды.
Шара соңында спортшымен естелікке суретке түсіп, қолтаңба алды.
Арайлым Есмағұлова,
Бөкей Ордасы
