Переметный ауылында Халықаралық жастар күні мен Спорт күні қатар тойланып, «Жастар үні – ел намысы спортта, ел болашағы жастарда» атты салтанатты іс-шара өтті.
Мерекелік кешті аудандық мәдениет, тілдерді дамыту, дене шынықтыру және спорт бөлімінің басшысы Дәулеткерей Құсайынов ашып, Бәйтерек ауданының спорттағы жеңістері мен жастардың қоғамдағы белсенділігіне тоқталды.
Іс-шара аясында ел намысын қорғап жүрген үздік спортшылар – спорт шеберіне үміткер Ерлан Нұрқаев пен халықаралық дәрежедегі төреші Сырымбет Здуринге аудан әкімінің алғысхаты табысталды. Сондай-ақ ауылдық округтерден келген бір топ белсенді жасқа аудан әкімі орынбасарының алғысхаты, ал белсенді еріктілер мен экология жанашырларына Жастар ресурстық орталығы басшысының марапаттары берілді.
Салтанатты жиын аудан өнерпаздарының жалынды концерті мен жастарға арналған интерактивті ойындарға ұласты.
Салтанат Шоқан,
Бәйтерек ауданы
