«Зерделі» ақыл-ой дамыту орталығының ұйымдастыруымен 10-11 сыныптар арасында «Алтын түлек» математикалық олимпиадасының республикалық кезеңі Жәңгір хан атындағы БҚАТУ-да өтті.
Оқушыларының олимпиадаларға дайындығын жақсарту және пән бойынша ерекше қабілетті балаларды анықтау, олимпиада резервін қалыптастыруды мақсат тұтқан білім сайысының аудандық кезеңі былтырғы 1 желтоқсанда өтті. Оған 23 бәйтеректік өрен қатысты.
Республикалық кезеңде аудан намысын қорғаған Янайкин ауылындағы Т.Бигелдинов атындағы орта мектептің 10-сынып оқушысы Бегімай Қанатбергенқызы тең құрбысының алды болып, үздік деп танылды.
- Мен кішкентай кезімнен есеп шығарғанды жақсы көремін. Осы жарысқа қатысқанда бәсекелестің көп болатынын сездім. Бірақ І орын аламын деген ой болған жоқ. Республикалық жарыстың есептері өңірлік жарыстың есептеріне қарағанда оңайлау болды. Үш блоктан тұратын есептерді шығаруға көп қиналғаным жоқ, - деді Бегімай Қанатбергенқызы.
Бегімайдың ұстазы, аталмыш мектептің мұғалімі Айсұлу Сариеваның сөзіне қарағанда, шәкірті - сыныбының көшбасшысы, «Алтын белгіге» үміткер. Ол күнделікті үй тапсырмасын әрдайым жақсы орындайды. Аудандық, облыстық олимпиадалардың жүлдегері.
- Біз Бегімай екеуміз осы олимпиадаға жатпай-тұрмай дайындық жасадық, сол еңбегіміз ақталды. Осы бағытынан таймаса, болашақта одан жақсы маман шығарына сенім мол, - дейді Айсұлу Сариева.
Салтанат Зұлқарнаева,
Бәйтерек ауданы
zhaikpress.kz
