Ерекше дарынды балаларды таңдап, өнерлі балалардың шығармашылық қабілеттерін дамыту, есімдерін елге таныту мақсатында Тасқала аудандық мәдени-демалыс орталығының ұйымдастыруымен Балалар жылы аясында «Бала дауысы» аудандық байқауы өтті.
Ақпан айында басталып, ауылдық округтерде іріктеу кезеңдері өткізілді. Аудан бойынша сексенге жуық өнерпаз қатысты. Ән әлеміне қанат қаққан өнерлі өрендер туған жерге, ата-анаға, әлемге, балалық шаққа, достыққа деген сүйіспеншілікке толы әндерді шырқады.
Байқау нәтижесінде Ақтау ауылдық округінің Инсар Мерекеұлы бас жүлдеге ие болып, жеңімпаз атанды.
6-10 жас аралығында өнер көрсеткен өнерпаздардың арасынан Амангелді ауылынан қатысқан Жансая Есенғали, 11-16 жас аралығында Оян ауылынан қатысқан Айару Әбухан оза шауып І орынға ие болды.
ІІ орынды 6-10 жас аралығындағы үміткер Салтанат Ұзақбаева /Қазақстан/, 11-16 жас аралығында Инара Байбулатова /Бірлік/ иеленсе, ІІІ орынға 6-10 жас аралығындағы қатысушылар Аяжан Ерғали /Шежін/, Рысқали Эльнара /Мереке/, 11-16 жас аралығында Аңсағаным Жұмаш /Шежін/, Талапқали Айқын /Амангелді/ өзара бөлісті.
Сонымен қатар Рахым Рамазан «Жас толқын» /Мерей/, Алтынзер Берік «Өнерлі өрен» /Тасқала/, Мирдана Избасарова «Көрермен көзайымы» /Достық/, Аминат Длимова «Жас дарын» /Бірлік/, Жасұлан Айкөркем «Самға, жас қыран» аталымдарымен марапатталды.
Жоғары деңгейдегі дайындықпен келген, сахналық образымен ерекшеленген, талғамының көркемдік деңгейімен, орындау шеберлігімен дараланған жеңімпаздарға дипломдар мен сыйлықтар табысталды.
Бинұр Хабидашева,
Тасқала ауданы
zhaikpress.kz
