Ресей Федерациясында вахта әдісімен жұмыс жасайтын 31 жастағы Орал қаласының тұрғынынан коронавирустық инфекция анықталып отыр.
-Ресей Федерациясының Саратов облысымен шекарадағы "Тасқала" автоөткеліндегі санитарлық-карантиндік бекетте эпидемиолог мамандармен қашықтық термометрия және сауалнама жүргізу кезінде, азаматтан дене қызуының көтерілуі анықталған. Аталған азамат іс-әрекет алгоритміне сай оқшауланып, жедел жәрдем көлігі шақырылды. Барлық эпидемияға қарсы іс-шараларды сақтай отырып, аталған азамат провизорлық стационарға жеткізіліп, коронавирус жұқпасына талдау жасалды.
ПТР диагностикалық зерттеу нәтижелері бойынша COVID-19 диагнозы нақтыланды. Қазіргі уақытта облыстық жұқпалы аурулар ауруханасында жеке боксқа орналастырылды.
Науқастармен қарым-қатынаста болған адамдар анықталып, барлығы медициналық бақылауға алынды.
Ауру ошақтарында эпидзерттеу жұмыстары, "Ұлттық сараптама орталығы" БҚО бойынша филиалы дезинфекция орталығы мамандарымен дезинфекциялық жұмыстар жүргізілді, - дейді БҚО көрсетілетін қызметтер мен тауарлардың сапасы мен қауіпсіздігін бақылау департаментінің басшысы Мұхамғали Арыспаев.
Бүгінде аймақта COVID-19 коронавирустық инфекцияға шалдыққан барлығы 8 адам облыстық жұқпалы аурулар ауруханасына ем алуда. Олардың 7-еуі Ресейден (оның төртеуі Өзбекстан азаматы), біреуі Атырау облысынан келді.
zhaikpress.kz