ҚР Президенті Н.Назарбаевтың "100 нақты қадам" Ұлт жоспарының 50-ші қадамы электр энергетикасы саласын қайтадан құру, «бірыңғай сатып алушы» моделін енгізу жайында. Мұнда өңірлер арасындағы электр энергиясының әр түрлі тарифтерін реттеуге мүмкіндік беретіндігі атап айтылған.
«Батысэнергоресурсы» ЖШС-нің Жаңақала аудандық бөлімінің жетекшісі Қанат Оразалиевтің айтуынша, соңғы кезде ауданда электр қуатын пайдаланушылар арасында жарықты пайдаланғаны үшін төлемдерін уақытында төлемейтіндер көптеп кездеседі. Оның ішінде 2-3 ай бойы төлемесе, жанұясына берілетін лимиттен асып кететінін, егер қаралған лимиттен асқан жағдайда 11 теңге 02 тиын болатынын біле тұра, ұрыс-керіс шығарып, кінәні өздерінен емес, мекеме қызметкерлерінен көретіндері бар. «500 немесе 1000 теңгеде тұрған не бар, көбейген соң төлеймін» дейтін тұтынушылар жиі кездеседі екен.
Осылайша әр ауылдан 20-25 адамнан болып, олар 3-4 ай бойы төлемейтін болса, онда қарыз қордаланып қалатын түрі бар. Сондықтан тұрғындар арасында бірқатар түсінік жұмыстары жүргізіліп, аудандық газетке де жарияланды. «Ендігісін уақыт көрсетеді» дейді аталмыш мекеме қызметкерлері.
Н.ЕСЕТОВА
Жаңақала ауданы