Бірінші Лига командалары арасындағы ел біріншілігінің соңғы турын өз алаңында елордалық "Астана М" командасына қарсы өткізген "Ақжайық" қарсыластарын 5-1 есебімен жеңді.
Толығымен ойын тізгінін бақылауында ұстаған оралдық ойыншылар матчтың 29-шы минутында есеп ашты. Гол авторы Мелло Джакомо. Ізін ала Ерболат Рүстемов есепті еселеді. Бірінші тайм орта белінен асқанда жергілікті футбол мектебінің түлегі Максим Литвинов есепті үште нөлге жеткізді. Осылайша бірінші таймды түйіндеген Авакянц шәкірттері екінші таймда да шабуылын тоқтатпай Мелло Джакомоның көмегімен есепті 4-0 жеткізді.
Ірі есеппен жеңіліп жатса да жасымаған елордалық команда ойыншылары есеп айырмасын қысқартқанмен матчтың нүктесін Владимир Покатилов қойды. Қорытынды есеп 5-1. Ақжайықтың тікелей қарсыласы "Алтай" "Екібастұз" клубымен болған ойында ұпай жоғалтып, "Ақжайық" қола медаль еншіледі.
Енді Премьер Лигаға шығу үшін "Ақжайық" қосымша матч ойнайды.
Түгелбай Бисен
"Ақжайық" футбол клубының баспасөз хатшысы
суретке түсірген Мейірбек Тажкуранов
