Орал қаласында тұрғындар көп жиналатын орындарда халықты жаппай вакцинациялау үшін жылжымалы екпе бекеттері жұмыс жасай бастады.
Жылжымалы емханалар шаһардағы «City Center», «Asia Mall» сауда үйлері мен орталық базар маңында екпе шарасын жүргізуде. Ал Зашаған кентіндегі «Жәңгірхан» сауда үйі ауласында орналасқан екпе бекеті мамандандырылған халыққа қызмет көрсету орталығына барып, ауыспалы мерзіммен жұмыс жасайды.
Аталған орындарға барған кез келген қала тұрғыны жеке куәлігін көрсетіп, короновирус індетіне қарсы екпе салдыра алады. Жылжыламы бекетке келуші алдымен толық медициналық тексерістен өтеді. Егер денсаулығында кінәрат болмаса, екпе алуға жолданады. Белгіленген тәртіпке сәйкес вакцина салдырған адам 30 минут дәрігердің қадағалауында болады.
Біздер 28 сәуірден бастап «City Center» сауда үйінің ауласында тұрғындарға қызмет көрсете бастадық. Бірінші күні түстен бастап жарты тәулік ішінде 80 адам екпе алса, бейсенбі таңғы сағат 10-нан кешкі 10-ға дейін 280 тұрғын вакцина ектірді. Бүгін үшінші күн. Келушілердің легі күн санап артып келеді. Күні кеше М.Өтемісов атындағы БҚУ-да келісімшартпен оқытушы болып жүрген екі фелипин азаматы да осы жерден екпе салдырды. Вакцина алған тұрғындардың барлығы қазақстандық бірегей базаға тіркеледі. Сондықтан бұл жылжымалы емханалардан кез келген адам екпе ала алады. Яғни вакцина алушының тұрғылықты жері еш маңызды емес. Аудан-ауылдан келгендер де екпе алуларына болады.
Бірінші екпені осы жерден алған адам, екіншісін басқа қаладан немесе тұрғылықта жерінен ала беруге құқылы. Барлық қажетті құрылғымен жабдықталған автобус облыстық денсаулық сақтау басқармасынан бөлінді. Жылжымалы емханада 10-нан астам медицина мамандары жұмыс жасауда. Олардың қатарында келушілердің денсаулығын тексеретін екі дәрігер, екпе егетін екі мейірбике болса, қалғандары келушілерді тіркейтін, оларға кеңес беретін медқызметшілер. Екі тәулікте 400-ге тарта тұрғындарға екпе салынды. Ешқайсысында жайсыздық пен асқыну белгілері байқалған жоқ, - дейді №1 қалалық емхананың дәрігер-эпидемиологы Қайрат Төлегенов.
Айта кетейік, екпе алуға ниетті тұрғынға өз таңдауына байланысты қазақстандақ «QAZVAC» немесе ресейлік«Спутник-V» вакцинасын алуына болады. Аталған жылжымалы бекеттер сағат 10.00-ден бастап 20.00-ге дейін қызмет көрсетеді. Егер келушілердің легі толастамаса жұмыс уақыты 22.00-ге дейін ұзартылады.
Нұрбек Оразаев,
zhaikpress
Николай ЗАХАРОВ,
қала тұрғыны:
- Орал қаласының байырғы тұрғынымын. Жасым 79-да. Кеше ұл-қыздарым осы жерге келіп, екпе алды. Үйім осы маңға жақын орналасқан соң мен де бүгін вакцина алуға келіп тұрмын. Жаз мезгілі басталған соң саяжайға барып, табиғат аясына демалуға шығамыз. Қоғамдық көліктерге мінеміз. Өзімді және айналамдағыларды қауіпті індеттен қорғау үшін екпе салдыруға бел будым. Әр адамның емін-еркін жүріп тұруы үшін дені сау болу керек. Мына жылжымалы бекеттер тұрғындарға өте ыңғайлы екен.
Зиягүл ЖАҚЫПОВА,
қала тұрғыны:
- Мен қаладағы балабақшада мейірбике болып жұмыс жасаймын. Күнделікті жұмыс барысында балалармен, олардың ата-аналарымен тығыз қарым-қатынаста жұмыс жасаймын. Кімнің ауру, кімнің сау екендігі бізге беймәлім. Жеке басымды және жанұямды короновирустан қорғау үшін бүгін екпенің бірінші сатысын алдым. Осыдан үш ай турасында әлемді жайлаған індетпен 74 жасар анам ауырды. Қазір жағдайы жақсы. Алдағы уақытта дерт жұқтырмау үшін вакцина алу маңызды деп есептеймін.
