Ұлттық экономика вице-министрі Асан Дарбаевтың Үкімет отырысында мәлімдеуінше, Президент тапсырмасымен қабылданған «Энергетикалық және коммуналдық секторларды жаңғырту» ұлттық жобасы шеңберінде 2029 жылға қарай еліміздегі желілік инфрақұрылымның тозуын орта есеппен 40%-ға дейін қысқарту жоспарланып отыр.
Фото: KZgovernment
Осы кезеңде тартылатын инвестициялардың жалпы көлемі 13 трлн теңгені құрайды. Бұл қаражаттың 6,8 трлн теңгесі коммуналдық секторға, ал 6,2 трлн теңгесі энергетика саласын дамытуға бағытталады.
Бөлінген қаржы есебінен 84 мың шақырым желіні жөндеу және жаңғырту, 7 309 мегаватт қуатты іске қосу, сондай-ақ 27 энергия өндіру нысанын салу мен реконструкциялау көзделген. Жоба нәтижесінде нысандардағы апаттылық деңгейі 25%-ға азайып, жылу, электр, сумен жабдықтау және су бұру салаларындағы табиғи монополиялардың 247 субъектісі қамтылады.
Сонымен қатар 2029 жылға қарай 70 коммуналдық кәсіпорынды тәуекелі жоғары дағдарыстық аймақтан шығару жоспарланған.
