Тәуелсіздік күні қарсаңында сан саланың маңдайалдылары да марапатталды. Бөкей ордасы ауданы әкімі салтанатты шара барысында еселі еңбегімен танылған сала мамандарына "Жыл үздігі – 2019" аталымы бойынша марапаттарын табыстап, бағалы сыйлық тарту етті.
Аудандық аурухананың күндізгі стационар медбикесі, отыз жылдан астам еңбек өтілі бар Райгүл Жанұзақова «Үздік медициналық қызметкер»;
Он жылдық еңбек жолында талай талапты шәкірттің жолын ашып, өнерге баулыған Қ.Сағырбаев атындағы мектептің мұғалімі Айымгүл Жапаева «Үздік ұстаз»;
Ауданаралық, аудандық мәдени-көпшілік шараларды жоғары деңгейде ұйымдастырып, біліктілігімен танылған Мұратсай ауылдық мәдениет үйінің директоры Қасым Есекешов «Үздік мәдениет қызметкері»;
12 жылдық қызмет жолында полиция майоры шеніне, ІІ дәрежелі маман атағына, «Мінсіз қызметі үшін» медаліне ие болған Дәурен Сертеков «Үздік полиция қызметкері»;
Асыл тұқымды мал селекциясын кәсіп қылып қана қоймай, алдағы уақытта бақша егуді ойға алған шаруашылық иесі Игнат Исағалиев «Үздік шаруа қожалық жетекшісі»;
Қырық жылға жуық еңбек өтілі бар еңбек бекторысы, мал дәрігері Мұхит Нажимов «Үздік ауылшаруашылық қызметкері»;
Азаматтарды қоғамдық жұмыстарға, әлеуметтік жұмыс орындарына, кәсіби даярлауға жіберу қызметтерін мінсіз атқарып, еңбегі елге еленген Айгүл Әбілхаирова «Үздік әлеуметтік қызметкер»;
Мектеп қабырғасынан спортты серік етіп, түрлі деңгейдегі спорттық аламандарда "үздік ойыншы" танылған мемлекеттік қызметші Мереке Бисембаев «Үздік спортшы»;
Соңғы бес жылда мемлекеттік грант арқасында жиһаз жасап, несібесін арттырған Жанар Садарова «Үздік кәсіпкер»;
Биылғы жылы мемлекеттік қызметшілер арасындағы облыстық байқаудың жеңімпазы аталып, республикалық байқаудың жүлдегері атанған Бисенбек Насимоллин «Үздік мемлекеттік қызметкер» ;
Он жылға жуық жыл ішінде талапшыл тәрбиеші танылып, ата-аналар алғысына бөленген ұялылық Бақыт Иманғалиева «Үздік балабақша қызметкері»;
Жиырмаға жуық жыл кітапхана саласында табан аудармастан қызмет жасап келе жатқан Айнагүл Батырханова «Үздік кітапхана қызметкері»;
Жастар жылында белсенділігімен, жан жақтылығымен көзге түскен, көптің қошеметіне бөленген бисендік Нұрбол Өтеғалиев "Үздік жастар жетекшісі" номинациялары бойынша марапатталады.
"Орда жұлдызы" ақпарат
zhaikpress.kz
Батыс Қазақстанның маңызды жаңалықтарын біздің Instagram-дағы парақшамыздан және Telegram арнамыздан алғашқы болып біліңіздер
