ҚР Қорғаныс министрлігінің баспасөз қызметі ОКҚ-да өткен баспасөз мәслихатында Әскери білім және ғылым департаментінің бастығы полковник Мұрат Олжабаев елімізде 15-31 шілде аралығында әскери оқу орындарына қабылдау науқаны жүріп жатқаны туралы хабардар еткенін мәлімдейді.
Фото: gov.kz
Биыл әскери институттарға 723, ал әскери колледждерге 760 орын бөлінген, онда курсанттар мен кадеттер мемлекет тарапынан толық қамтамасыз етіледі және оқуды аяқтаған соң Қарулы күштерде әскери лауазымдарға тағайындалады. Қазіргі таңда үш институтты, бес колледжді және Ұлттық қорғаныс университетін біріктіретін әскери білім беру жүйесін кешенді жаңғырту жүргізілуде. Оқу үдерісіне ақпараттық қауіпсіздік, криптология, радиоэлектрондық күрес, ұшқышсыз авиациялық жүйелер, сондай-ақ жасанды интеллект, виртуалды және толықтырылған шынайылық сияқты пәндер белсенді енгізілуде.
Қабылдау науқанын цифрландыру аясында құжаттарды eGov.kz порталы арқылы тапсыру жолға қойылып, рәсімдеу мерзімі 120 күннен 30 күнге дейін қысқарды. Өткен жылғы қабылдау науқанының қорытындысы бойынша әскери колледждерде бір орынға орта есеппен үш үміткерден, ал әскери институттарда екі үміткерден келіп, авиация, әскери медицина, автоматтандыру және АКТ салалары жоғары сұранысқа ие болған.
Сондай-ақ халықаралық ынтымақтастық кеңейіп, қазіргі уақытта 300-ден астам қазақстандық курсант Қытай, Түркия, Корея, АҚШ, Ресей, Әзербайжан, Армения және Беларусь елдерінде білім алуда. Жүйені жаңғырту әскери қызметшілерді даярлаудың жоғары технологияларға негізделген жаңа моделін қалыптастыруға бағытталған.
