Теректі ауданындағы Подстепный жалпы білім беретін № 1 мектебінде «Жас сарбаз» әскери-патриоттық қозғалысы сыныбының ашылуына және оқушылардың салтанатты ант қабылдауына арналған салтанатты іс-шара өтті.
Мемлекет басшысы Қасым-Жомарт Тоқаев жастар тәрбиесіне, өскелең ұрпақтың бойында патриотизмді, азаматтық жауапкершілікті, тарихқа және мемлекеттік құндылықтарға құрмет сезімін қалыптастыру мәселелеріне ерекше назар аударады. Президент білім беру мен тәрбиенің қатар жүруі қажеттігін атап өтіп, жастардың патриоттық рухта, жауапкершілікпен және жасампаздық бағытта өсуінің маңыздылығын үнемі баса көрсетіп келеді.
Осы тұрғыдан алғанда, «Жас сарбаз» сыныбының ашылуы – мектеп пен жұртшылықтың жастарды әскери-патриоттық тәрбиелеу, оқушылардың бойында Отанға деген сүйіспеншілікті, Отан қорғаушыларға құрметті, тәртіпті, жауапкершілікті және өз еліне қызмет етуге дайындықты қалыптастыру жөніндегі міндеттерді іске асыруға қосқан нақты үлесі.
Сыныптың ашылуы мектеп өміріндегі маңызды оқиғаға айналып, өскелең ұрпақты әскери-патриоттық тәрбиелеуді ұйымдастырудағы елеулі қадам болды.
Жаңадан ашылған «Жас сарбаз» сыныбына мектептің алғашқы директоры Ғ. Ақежановтың есімі берілді. Бұл шешім мектептің қалыптасуы мен дамуына, білім беру ісіне және оқушылардың бірнеше буынын тәрбиелеуге елеулі үлес қосқан тұлғаның рухына көрсетілген терең құрметтің белгісі болды.
Жастарды әскери-патриоттық тәрбиелеу жүйесінде «К. Құлажанов атындағы Қазақ технология және бизнес университеті» АҚ маңызды орын алады. Аталған оқу орнының базасында 2024 жылдан бастап әскери кафедра жұмыс істейді. Кафедраның қызметі жастардың бойында патриотизмді, азаматтық жауапкершілікті, әскери дәстүрлерге құрметті және Отанға қызмет етуге дайындықты қалыптастыруға бағытталған.
Әскери кафедраның жұмыс тәжірибесі, әскери бөлімдермен, ардагерлер ұйымдарымен және білім беру мекемелерімен өзара іс-қимылы ұрпақтар сабақтастығын нығайтуға, әскери қызметтің беделін арттыруға және жастардың Отан қорғауға саналы көзқарасын қалыптастыруға ықпал етеді. Осындай бастамалар, соның ішінде «Жас сарбаз» әскери-патриоттық қозғалысы сыныптарының ашылуы Қазақстан Республикасының лайықты азаматтарын тәрбиелеуде үлкен маңызға ие.
Сыныптың ашылуына дайындық барысында мектептің сынып бөлмесі мен дәлізінде Қазақстан Республикасы Қарулы Күштерінің тарихына, әскери дәстүрлерге, Отан қорғаушылардың ерлігіне және жастарды әскери-патриоттық тәрбиелеуге арналған көрнекі ақпараттық материалдар әзірленіп, орналастырылды.
Іс-шараға Қазақстан Республикасы Қарулы Күштерінің «Батыс» өңірлік қолбасшылығы мен Қазақстан Республикасы Ұлттық ұланының «Батыс» өңірлік қолбасшылығы әскери қызметшілерінің қатысуы оған ерекше мән берді. Әскери қызметшілер оқушыларға әскери киім үлгілерін көрсетіп, әскери қызметшілердің күнделікті өмірі, әскери қызметтің ерекшеліктері, әскери тәртіп пен дәстүрлер туралы әңгімеледі. Мектеп оқушылары әскери қызмет жағдайларымен танысып, өздерін қызықтырған сұрақтарға жауап алды.
Іс-шараның негізгі бөлігі «Жас сарбаз» сыныбы оқушыларының салтанатты ант қабылдау рәсімі болды. Жас қатысушылар үшін бұл Қазақстан тарихы мен Қарулы Күштерінің тарихын зерделеуге, дене және моральдық-психологиялық даярлықтарын жетілдіруге, жауапкершілік пен тәртіпті тәрбиелеуге, сондай-ақ азаматтық борышын абыроймен орындауға дайын болуға бағытталған жаңа кезеңнің символдық бастауы болды.
Іс-шараға жергілікті атқарушы органдардың, білім беру саласының, қорғаныс құрылымдарының және әскери-патриоттық қозғалыстың өкілдері, ардагерлер, әскери қызметшілер, педагогтер, оқушылар, сондай-ақ мектептің алғашқы директоры Ғ. Ақежановтың туыстары қатысты.
Өмірінің көп жылын білім беру мен өскелең ұрпақты тәрбиелеуге арнаған ардагер ұстаздарға ерекше алғыс айтылды.
Көп жылдық педагогикалық еңбегі, мектептің дамуына және оқушылардың бірнеше буынын тәрбиелеуге қосқан елеулі үлесі үшін терең құрмет пен ризашылықтың белгісі ретінде ардагерлерге Батыс Қазақстан облысы әкімінің атынан естелік белгілер мен алғысхаттар табысталды. Атап айтқанда, Альфия Потаповаға, Любовь Беликоваға, Зоя Горшковаға, Ольга Сибинаға, Татьяна Утароваға, Алия Бахитжановаға, Гульжиян Бушановаға құрмет көрсетілді.
Подстепный жалпы білім беретін № 1 мектебінің директоры Райхан Жумагазиеваға «Жас сарбаз» сыныбын ашу бастамасын көтеріп, қолдау көрсеткені және оны ұйымдастыруға тікелей қатысқаны үшін ерекше алғыс айтылды.
Әскери бастапқы дайындық пәнінің жетекшісі Роман Калининге де мектеп оқушыларын әскери-патриоттық тәрбиелеу бағытында атқарған ауқымды жұмысы, оқушыларды салтанатты іс-шараға дайындағаны, әскери-патриоттық іс-шараларды ұйымдастырғаны, тәртіпті қамтамасыз еткені, сондай-ақ «Жас сарбаз» сыныбын құру мен дамытуға белсенді қатысқаны үшін ерекше алғыс білдірілді.
Алғысқа лайық азаматтар қатарында облыс әкімінің көмекшісі, полковник М. Мұқанов, «Батыс» өңірлік қолбасшылығы әскерлері қолбасшысының тәрбие және идеологиялық жұмыс жөніндегі орынбасары, подполковник А. Жумагазиев, Батыс Қазақстан облысының Қорғаныс істері департаментінің бастығы, полковник А. Ахметов, Теректі ауданының Қорғаныс істері бөлімінің бастығы, подполковник Р. Шарипаев, «Жас сарбаз» әскери-патриоттық қозғалысының Батыс Қазақстан облыстық филиалының төрағасы М. Аққалиев, сондай-ақ осы маңызды оқиғаға қатысқан педагогтер, әскери қызметшілер, ардагерлер және қоғам өкілдері де бар.
Е. Бятов,
ҚР Қарулы Күштерінің ардагері, запастағы полковник
