Бүгін Мемлекет басшысы Қасым-Жомарт Тоқаевтың Қазақстан халқына арнаған Жолдауы еліміздің алдағы даму бағдары мен қоғам алдындағы жауапкершілікті тағы бір мәрте айқындады.
Менің ойымша, Жолдаудың маңызын көтерілген мәселелердің ауқымымен ғана емес, олардың халықтың күнделікті өміріне қаншалықты оң өзгеріс әкелетінімен бағалауымыз қажет. Өйткені мемлекеттің қуаты экономикалық көрсеткіштермен ғана өлшенбейді. Ол – азаматтардың тұрмыс сапасы, әлеуметтік тұрақтылық, сапалы білім мен қолжетімді медицина, қауіпсіз орта және болашаққа деген сенім.
Біріншіден, өңірлерді дамыту – ел өркендеуінің негізгі шарты.
Мемлекет басшысының еліміздің барлық аймағында құрылысты жандандыруға, әлеуметтік инфрақұрылымды дамытуға басымдық беруі ерекше назар аудартады. Бұл бағыттың ауыл-аймақ үшін маңызы зор. Мектеп, аурухана, мәдениет және спорт нысандарының қолжетімділігі – халықтың өмір сапасына тікелей әсер ететін факторлар.
Әсіресе, ауыл тұрғындары үшін сапалы инфрақұрылымның болуы туған жерінде тұрақтап, еңбек етуге, кәсіп ашуға және балалардың болашағын осы өңірмен байланыстыруға мүмкіндік береді. Сондықтан өңірлік даму жұмыстары тек құрылыс көлемімен емес, нысандардың сапасы, қолжетімділігі және халыққа беретін нақты пайдасымен бағалануы тиіс.
Екіншіден, көлік-логистика жүйесін дамыту – экономикалық мүмкіндіктерді кеңейтудің маңызды тетігі.
Қазақстанның географиялық орналасуы елімізге үлкен мүмкіндік береді. Осы әлеуетті тиімді пайдалану үшін көлік дәліздерін дамыту, инфрақұрылымды жаңғырту және өңірлер арасындағы экономикалық байланысты нығайту қажет. Бұл өз кезегінде кәсіпкерлікке серпін беріп, отандық өнімнің нарыққа шығуына және жаңа жұмыс орындарының ашылуына ықпал етеді.
Үшіншіден, кез келген реформаның түпкі нәтижесі халықтың әл-ауқатынан көрінуі керек.
Қабылданған шешімдер қарапайым азаматтың өмірінде сезілсе ғана өз мақсатына жетті деп айта аламыз. Жұмыс орындарының көбеюі, кәсіпкерлікке қолайлы жағдай жасалуы, әлеуметтік мәселелердің шешілуі және мемлекеттік қызметтердің сапалы көрсетілуі осының айқын көрінісі.
Бұл ретте орталық мемлекеттік органдармен қатар, жергілікті атқарушы билікке де үлкен жауапкершілік жүктеледі. Әрбір бастама өңірдің нақты қажеттілігіне сай жүзеге асырылып, бөлінген қаражаттың тиімді жұмсалуы мен атқарылған жұмыстың нәтижесі тұрақты бақылауда болуы қажет.
Төртіншіден, қоғамдағы бірлік, жауапкершілік пен тәртіп тұрақты дамудың негізі.
Мемлекет пен қоғамның ортақ мақсаты бір арнаға тоғысқанда ғана реформалар нәтижелі болады. Ол үшін мемлекеттік органдар ашық жұмыс істеп, азаматтардың талап-тілегіне құлақ асуы керек. Ал әрбір азамат қоғамдық жауапкершілікті сезініп, елдің дамуына өз үлесін қосуға ұмтылғаны жөн.
Бүгінгі кезең бізден жаңаша ойлауды, өзгерістерге бейімделуді және нақты нәтижеге жұмыс істеуді талап етеді. Сондықтан Жолдауда белгіленген міндеттерді жүзеге асыруда кәсібилік, ашықтық және жауапкершілік басты ұстаным болуы тиіс.
«Біз әрбір азаматтың қолайлы ортада өмір сүруін қамтамасыз етуіміз керек», — деп атап өтті Мемлекет басшысы.
Қорытындылай айтқанда, Жолдау тек алдағы міндеттердің тізімі емес, ел дамуының басымдықтарын айқындайтын маңызды құжат. Бұл Жолдау әрбір қазақстандықтың тұрмыс сапасын жақсартуға және мемлекетіміздің бәсекеге қабілеттілігін арттыруға бағытталған нақты іс-қимыл жоспары. Ендігі міндет осы мақсаттарды жүзеге асыру.
Светлана Ешматқызы
Шыңғырлау ауданы
